mia persuna

Meis nom es Arno Sulser ed eu sun nat a Scuol als 2 schner dal 1953, creschü sü a Strada e n’ha lavurà sco magister a Basilea ed in Engiadina. Daspö 6 ons viva darcheu al lö da mi’infanzia. In gir ed in viadi n’haja suvent la camera per mans. Tuot tenor l’intenziun po quai esser ün apparattin plü compact o eir ün equipamaint plü pesant.

Üna da las fascinaziuns dal fotografar es per mai da chattar l’equiliber tanter ün motiv e la reducziun dal motiv ad ün detagl. Laschond ir il motiv cumplessiv, nascha üna nouva cumposiziun. La fotografia in alb e nair es seguond meis avis predestinada per intensifichar quist möd da fotografar. Inscenar la dinamica dals tuns grischs, inclus l’alb e’l nair, lavurar cun fuormas contrasts e conturas in stil expressiv, quai es e resta per mai üna sfida grondiusa.

Da mat d’eira intusiasmà da la Rolleiflex legendaria da meis bap ; üna camera fenomenala a duos ögls cun roderas per manipular ils differents parameters cumpletamaing in möd mecanic. Minchatant laschaiva’l far eir a nus uffants üna fotografia e transportar davopro precautamaing il film culla manvella, fin chi apparaiva il nomer successiv aint illa chaistina. Quist d’eira sgüra l’impuls per l’interess vi dal fotografar da plü tard.

Cun la prüma paja n’haja miss ad ir üna camera a reflex cun differents objectivs s-chamgiabels. Da là davent es dvantà il fotografar üna da las occupaziuns predilettas dürant meis temp liber. Da quel temp cuostaivan eir las fotografias malgratiadas üna bella somma, hozindi be plü ün clic. Per megldrar la qualità da meis purtrets daiva be la pussibiltà da perfecziunar l’adöver da la camera e sensibilisar l’ögl pel motiv e la glüm. Sch’eu pens eir amo a las uras aint illa chombra s-chüra, cur cha la surfatscha alba dal palperi fotografic survgniva conturas aint il bogn da sviluppar,

 Actualmaing fetsch eir eu adöver da la tecnica digitala e sun adüna darcheu surprais da las pussibiltads cha quista tecnica spordscha, inclusiv Photoshop. Lapro prouva da restar autentic, uschè s-chet sco pussibel, fidel al motiv. Tuot il cliccöz, selfieöz e fotoshopöz chi serva be per pavlar las medias socialas di per di cun milliuns da nouvas fotografias am dà da pensar e lapro am vain adimmaint ün citat dad 

Henri Cartier Bresson : 

«Üna buna fotografia es üna chi’s contaimpla daplü dad üna secunda» 

https://www.rtr.ch/emissiuns/magazin-da-cultura/sin-ina-buna-fotografia-guard-ins-pli-ditg-ch-ina-secunda